موضوع: قصيدة سوس

[ءاداك داغ بدرغ لاخبار ن سوس د لواقيعانس
ءيصرفد ربي لامرنس ءيلخالاييق
وانا ءينوفلن كاراد ءوكان ياحل نغ ءارتمراتن
ءاداك داغ بدرغ لاخبار ن سوس دلواقيعانس
ءيصرفد ءوكليد غ رباض ءاوال ءيرقاسن
ءيكن كيسن ليستيرعا، ءيسمامي ف ءيموسلمن
ءيناياسن: سقسايت لعولاما غ تمازيرت
ما نيك رايك يان ءيعصان ربي د ءوكليد نس
ءيس ءورد لغرب ءيس ءيك وين شرفا ن تفيلالت؟
ءيموت سيدي لحاسان ، فلنتيد ءيواراو نس
ءيجمعا د ءورومي ف ءيغواغن د ءيكلاخن
غ لاجبال،كفيناسن طاراقا ءارتن ءيطوع
لفايدا ءيدرارن ن سوس ءاتين ءيسا تمشيويرن
نكرن س لجيهاد ءالن ءابراح ءار تحييالن
عمرن ءيضريسن ءولا ءيحفيرن خ تمازيرت
ليغ ءورين ءادنعمن لمخزن سول ءولا صولح
فاد ءايصرف ءوكليد س لحكام ءيس مشاوارن
ءازن س ءيخدامن تيليفون ءار تعلامن
لغرب ن ليصر دلغرب ليمن، دشام ءولا تونس
شهراين ءاغد كولو نجاماعنت لحركات نس
ءيعوول ف ءيسكاسن كراض ، لكييرا ءاف ءيحييل
ءاكو عبلا س ءيلالن س ءايت باها تاكوشت
س ويجان س ءايت جرار تيزي، ءار ءاكنس ن سيحل
كولو ءيكا لحراكي، دلكولونات محادانت
لحاكم ن تزنيت ءيس كان ءاديوان ءيس ءيشاطر
ءوسيند لكاغيد ءيسكر لالوف ن تبراتين
ءيكين كيس: وانا ءيران صولح ءيناتيد
هاد ءاكليد ءيصرفد لخليفت مولاي لحاسان
وانا ءيرا ءيهدو ءيكفاسن
ءيكفاسن لامان ءيفوكوتن
وانا ءوريرين دنب..
لفايدا لقابايل ءاتين ءيسا تمشيويرن
ءينا كرا: ءانهدو، ءيناكرا: لغدرت ءار تيلينت
مدن لغش ءاداك ءاقران ، ءيست ءاران خ تالوحت
ءيلا كرا ءيشا لمخزن ءور ءيلي غ لكناش نس
ءيغ ءيبيد لفيعل ءيقانتيد ءاد ءوفون نغ ءيشمت
هاكو عبلا غار طنزن كيس ، قاولناس
ليغاتن ءيسيكيل رولن كولو، فلناس ءيشابوكن
يوت لمخزن ديوان، سول ءيجمعا د ءوتييوت
ءيعمر ءاضراس كين سرس ءيليغاك ءور ءيعوول
لقايد لمهدي نتا ءولا ضرضوري د ءوتييوت
صرفن س بوستا ليغ ءولن عادا س تمازيرت
نكرن س لباروض ءيلما طييارا ءاساكاتن
ءوراسن توجي لاسواق ءولا ءادسمون لحركت
وانا ءيرا ءايحصار لمخزن، هان ءور ءيطاف لعاقل
نوضا س ءوزاغار نكشم س تزنيت ءار تومالغ
غين ءاغ ءيلا زيغ لاحكام ءولا لاقوام ءيكوتن
لكولون س واياض ، شورن ءاغار متابعان
من تزنيت س كيليز شورن ءاغار متاباعن
ليغ ءينكر س لباروض، تيزي ءاغ ديس ماكارن
مركسن، ءينكي لعجاج، لعفيت ترغامت
كادا ن واس ، ميدن غ ءيشبورا ءاغار مشاباكن
واماش ءاجموع دييض ءاتن كمل ءيدبابنس
ءيرا ءوباعمران ءايهنو تمي ن تمازيرت
جمعان د لكباص غ ءيفني ، ءاس ليغ راد ءيفغ
ءولا طارفايا، كويان ءيقبل شوروض نس
لقايد لحانافي ءيكراياسد لهم ءيكوتن
ءيفوم لحركات ءيعمر تمي ن تمازيرت
دان سرس ويليد شركن لحنانا كوتن
سي قدور ءاكرايمي ءايكان سيبانس
ءولا محماد ءوبوهوش ءور نحكير ءيمازالن
ناناس : راك ننصح، كفانغ لويجاب نك
ءيناياس لمخزن : ضالب كرا تريت ، ءاها ضامن
لخليفت لحوساين ءيسكر نيت عادا، راد ءيفوغ
ءيناياس عميس: راجعا ، ءاهان لامان نغويتن
ءاجانغ ءانهدو ءاكما ءانسرس ءيشابوكن
هان ميدن غوشان، ءورين ءيبلا ءايدانغ
من تونس ءاديكا لمخزن، ءورانك ءاعراض نس
ءاوال ءيفيلالن كفانت ءيلجدود نغ
ليغ ءيزرا ءوخصاصي مدن كان ءيمغدارن
ءيخيير ءاد هدون، ءاور ءيك لخلا تمازيرت
نجون ءيليفساد د لخلا ءاو ءيك سيبانس
ءيصافد ءوجرار س لقايد مبارك ءيس ماكارن
ءيناياس: ءيغ نكا يان صرفات س ءيمجاض ن تزلمي
ءولا ءيفران، ءاد كولو سمون لهدييات
نجون ءيسيجن ءولا لموت ءولا لخلا كوتن
ءيتابعات نتا د ءورخا ، صالحن تمازيرت
نان: ءارخا ءيكا غ ءايت لعيلم ءار تاباعن
سيدي علي ءوتزروالت شيخ ، د لوالدين
ءايس ءيكفا ربي، غوين كيس لمال زنزينت
ءور ءيمشاوار ءور ءيغدير، ءامر ءيستكا ضلمن

عمدان ءيداولتيت ءيفغاسند غايلي جو
ءور سين، ءولا عقلنت، نتني ءولا لوالدين
ييويس ن عدي ءوحماد صبرنس ءات ءيجنجامن
ءيرا لخير ءيمدن، ءيكفاس ربي س لجازانس
ءولا ءاصواب مولاي حماد ، كفان يادلي ضامن
مولاي حماد ءيلوكان ءيكا ءانبداد نس
واناكن ءيفوكان ءيضمنكن، ضفارت ليجارت
سول ءيضفرتنت ءيلمخزن يوت تمارا كوتن
ءيما شيخ عبلا كو وادريم د ءايت تيوازوين
كران ءاسكرس، ءيكر لحمل، ءيسموناسن كيسن
ءيما شيخ حماد ءامزال ءيطف لعاقل ءيكوتن
ءيكا لبور، ءيكا لبحور، ءيعبرت س تيدي نس[[